توا اكثر من جمعتين، معناها قبل ما تبدا دورة كأس افريقيا لكرة القدم، كل وسائل الإعلام ما تناقش كان في موضوع عودة الإرهابيين.وانقسمو الناس لكل لقسمين:
قسم يشوف انو هالإرهابيين منّا وإلينا، ومتاعنا وسلعتنا عادت إلينا، وانو اللحم إذا نتن ما إيلو كان اماليه، وبما اننا معروفين بالإعتدال والتسامح ومن جماعة عفا الله عما سلف، وطاح الكاف على ظلّو، وخاطينا الداعي وركوب البرداعي، ما نراوش مانع باش يرجعو لتونس الي هي ابري تو بلادهم وبلاد جدودهم ...
وقسم يشوف الي هالجماعة هاذم باعو ارواحهم للشيطان، ونكرو في هويّتهم التونسيّة، وفيهم شكون حرق باسابرتو، وماعادش مستعرف ببلاد سيدي محرز وسيدي بو مخلوف والسيدة المنوبيّة حبيبة ربي، وبصّ في اللوزة، يلوّج على هوية أخرى، وعلى أحلام أخرى، ويفنتزمي على عشرات الحوريات إلي وعدوه باش يتعرضولو في الجنة . فبحيث الجماعة هاذم ما يلزموناش ولا هوما منا ولا أحنا منهم، ومالأحسن انهم ما يرجعوش لبلادنا سينون رانا نبهذلو بحالهم ونكورو بيهم وإذا لزم نطورقو عليهم بالقانون، ونرتحو الإنسانية من وبائهم ومن ريحتهم السفشة ...
التقسيم هذا خلى برشا توانسة يتساءلو ياخي شكون أحنا؟ وعلاش ولينا هكا؟ وشكون تسبب في تقسيمنا؟ وشكون كان آسطا وسبب في تسفير الشباب إلى اغترو ومشاو جماعة منهم لليبيا، وجماعة لسوريا، وجماعة للعراق، وحتى لليمن وللتشاد وللنيجر وللسودان، ومن قبل لأفغانستان؟
اسئلة خلاتني نفكّر في شكون أحنا خاصة بعد ما ظهرت فيّة أخرى عندها تقويم غير التقويم المتعارف عليه، وتطالب بالإعتراف بأمازيغيّتها وبأنها تمثل سكّان البلاد الأصلين، وان لخرين لكل فالصو...
فأحنا سيدي خويا التوانسة، رجال أحرار مالذهيبة وراس جدير وبن قردان لطبرقة وعين دراهم ، الف ما فينا أف، كي صوابع اليد الوحدة ما نتفصلوش عن بعضنا ...
أحنا اولاد الخضراء عروقنا وعروق جدود جدودنا مغروسة في تربتها من أكثر من 65 ألف عام ... ارجعو للتاريخ وللآثار في قفصة والقطار، واد العكاريت والرديّف، والمقطع والقصرين والكاف، وام علي وقصر لمسة، والمتلوّي وعين أقطر، وقربة ونابل ووشتاتة، وواد مليان وعين برمبا...
وزيدو شوفو آثار الحضارة القبصيّة الي حُكمة البلاد من 8000 إلى 5000 سنة قبل ميلاد سيدنا عيسى ...
احنا ملح الأرض الطيبة المعطاء، وما نرضاش بالهمج والمتهورين والمتوحشين يرجعو يعيشو بيناتنا ...
أحنا الأحرار أولاد الحرة أم البلدان، صرّة العالم من قديم الزمان ...
رضعنا من صدر عليسة والجازية وعزيزة عثمانة، وبشيرة بن مراد وشريفة المسعدي، وخالتي مبروكة الفلاحة وام الزّين الجماليّة ...
 |
| صورة من #دڨة لحميد الدين بوعلي، من المصورين الفواوتوغرافين التونسيين المبدعين https://www.facebook.com/hamideddine |
بنينا حضارة ما زالت شواهدها واقفة لتوا... زينّا أرضيات وقصورات الملوك والأباطرة بقطع فسيفساسية صنعتها يدين جدودنا ...
غذينا الرومان بقمح بلاد افريقيا وبغلّة سوانينا... سقيناهم خمور من كرومنا .... قدمنا للكنيسة المسيحية أفضل كتّابها وفلاسفتها، وعطينا لروما ثلاثة ملوك واباطرة يحكموها ...
من أرضنا انطلق الإسلام باش يستقر في بقية بلاد المغرب وفي جنوب أوروبا مالأندلس لصقليّة ...
خيراتنا وذهوباتنا هزّها المعز لدين الله الفاطمي باش يضوي بيها على المصاروة وبنا بيها مدينة القاهرة المعزّية واقام الدولة الفاطمية ...
أحنا الي بنينا بسواعد جدودنا جامع عقبة بالقيروان وجامع الزيتونة المعمور حامي حمى الإسلام السنّي المالكي الأشعري الجنيدي ...
أحنا الي نجحنا في التوفيق بين العقل والنقل ... ونشرنا مبادىء الإعتدال والتسامح والعقلانية العلمية...
احنا الي تحررت المراة في بلادنا مالكلاكل الي قيدها بها التحجر الفكري إلي عطّل الإجتهاد في الدين بدعوى أن لا جديد تحت الشمس، وانوليس بالإمكان أحسن مما كان، وانو يصعب على الأواخر الإتيان بما جاء به الأوائل، وانو المُستجدّات بدعة وان كل بدعة فتنة وكل فتنة ضلالة وكل ضلالة في النّار...
أـحنا أحفاد عليسة وأملكار وحنبعل والفاتنة صوفونيبة والعالم ماغون ... أحنا أحفاد يوغرطة وماسينيسان وسانت اوغيستينوس والإمام سحنون والبهلول بن راشد والقاضي عياض وابن عرفة ...
احنا من نسل عبد الرحمان بن خلدون والثعالبي والحداد وفرحات حشّاد وبورقيبة والماطري والمنجي سليم والطيب المهيري والطاهر بن عمّار و والهادي شاكر وعلالة البلهوان والحسين بوزيان وجلولي فارس والرويسي ...ومن قبلهم الكاهنة وعلي بن غذاهم الماجري ومصباح الجربوع والبشير بن سديرة...
واحنا تلامذة المشايخ النيفر وجعيط وبلخوجة والمحجوب وابن أبي الضياف وسليمان بو حاجب ... اتباع احمد باشا باي وخير الدين التونسي وابن عاشور صاحب التحرير والتنوير ...
احنا فئران الداموس من قفصة والرديف والمتلوي وام العرايس وكاف الشفاير وسرا الورتان والقلعة الخصبة وتمرة وبوقرين ....
أحنا فلاّحة الجريد قبلي ونفطة وتوزر، صهدت الشمس الحارقة جلودنا وقطفنا الدقلة المدرجحة في عراجينها ... احنا فلاّحة السّاحل الي تشقّت ايدينا بجمعان الزيتون، وفلاحة بر افريقيا حصنا قمحها وشعيرها، وبحّارة بنزرت والمهديّة وطبرقة وصفاقس وجرجيس ... واحنا فلاّحة السبيبة جمعنا تفاحها ، وفلاحة دخلة المعاوين قطفنا قوارصها وفراوله، وخضرتها فلفل وطماطم وسفناريا ولفت وبسباس وكرمبيط، واحنا مغارسية صفاقس نبّعنا اشجارها زيت صافي يسافر لكل البلدان ...
احنا إلي نفرحو بالصيف ونرشقو مشامم الفل والياسمين ونتمشّاو على كرنيش بنزرت وبوجعفر وال 100 ماتر في صفاقس، ونتبخترو مع نسانا وصغارنا في شوارع حلق الواد والكرم والمرسى، ونترشفو تاي سيدي بو سعيد المنعنع ، ونفرهدو أولادنا ونشيخوهم بالقلاص متاع سالم وبكسكروتات جوزاف المرسى، ونشريوولهم بنبالوني نابل ولبلابي الحطاب وصحن تونسي من عند مانينو الباساج، ونسقيوهم الجواجم الصفاقسية ونذوقوهم زلابية ومخارق وريقونة باجا ومحشي تطاوين وبسيسة تكرونة وزميطة جربة ... ...
أحنا إلي نعمرو المهرجانات الصيفيّة وأيام قرطاج المسرحية والسينمائية... واحنا إلي نتبعو أخبار الثقافة في بلادنا وفي العالم، وندمنو على مطالعة كتب محمد الطالبي وألفة يوسف وعبد المجيد الشرفي ويوسف الصديق وتوفيق بكار ومحمد فنطر وهشام جعيط ومنيرة شابوتو وراضي دغفوس ومحمد المدب ...
أحنا إلي نستناو كل عام وبالدقيقة والدرج معارض الكتب ... أحنا إلي نعشقو شعر أدونيس وأحمد مطر والمتنبّي والشنفرى والبحتُري وأبو العتاهية والنواسي ...
احنا إلي ننتلذذو شعر نزار والشابي وجعفر ماجد ومحمد الصغير أولاد أحمد... ونشيخو كي نسمعو شعر البرغوثي ولسود وسيدي علي سعيدان كي يبدا يطرز في كلامو المعسول ...
احنا إلي نعملو نشوة بغنايات الشيخ العفريت وصليحة وعلية وصفية، وشُبيلة وشافية والشرفي وبوشناق وسيدي علي، وعم الهادي الجويني والصادق ثريا وغرسة، ونقشات عم خميس الترنان وأيا زهرة، واسماعيل ولد الحطّاب والفرزيت وحبّوبة ...
أحنا إلي نشيخو على زكرة بوديّة وعلى نوبة بن عروس وأم الزين الجمّالية ... ونتفاعلو مع سلامية بن محمود ومحمد شقرون والمثلوثي وإنشاد سمير البكوش وفرقة مشكاة... واحنا إلي نُطربو لغنايات فيروز كل صبحيّة وتعجبنا غنايات مرسال وجورج والهادي قلة والشيخ إمام العيسى وفرقة البحث الموسيقي وفرقة الموسيقى العربية......
أحنا إلي نبرو على بعضنا في الكورة، الشاحلي ينبّر عالمكشّخ، والمكشخ ينبّر عالزنطور، والزنطور ينبر عالصفاقسي ... لكن في لخّر لكل يجمعهم الفريق الوطني وتذوب وقتها الألوان ويوليو لكل يد واحدة ...
أحنا إلي تنبعو في أخبار العالم إلي ولا يغلي كي طنجرة البرغل... نعرفو الشقيقة والرقيقة والشيطان وين خبا ولادو... نحاولو نفهمو آش صاير في العالم من 11 سبتمبر 2001 لليوم ...أمريكيا ولا يحكمها واحد أسمر اللون، حررنا جدودو في تونس من عام 1846، شبيّب طويل وشباب قد الباب ... لكن حل على بلادو وعلى العالم باب جهنم بالحروبات الي خربت بلدان وشردت شعوب، والحال انو متحصل على جائزة نوبل ...للسلام، وهاو جا بعدو واحد راس متروش ناوي يزيد يخلوضها وكاننا في زمن الثلاثينات من القرن الفايت والله يحسن العاقبة وين باش ترصي بعد إلي منع مواطنين من بلدان اسلامية يحطو ساقيهم في بر الماريكان ...
بلداننا العربية قايمة على راس كلب ...حكم مترنح في مصر ... العراق غارقة في مكافحة الإرهاب ... سوريا في النازعات غرقا ...اليمن حدث ولا حرج واصبحت عرضة لهجوم تحالف ... عربي، معناها سيدي خويا العريبة ولات كي القرنيط كيف ما يلقاو ما يعملو يدورو على صوابعهم يقضمروهم ... واحنا في تونس نساعدو في رواحنا رويدا رويدا كيما قال عم الراجل، ونحاولو نقدمولقدام بعد ما عملنا ثورة ضد الظلم والطغيان وفتحنا الطريق قدام تحرر العرب وقدمنا الضحايا من عسكرنا وامننا وقادة الفكر متاعنا... بلعيد والبراهمي ما يمشيش دمهم خسارة وبيه نبنيو تونس الجديدة ...
احنا في كلمة واحدة التوانسة الأحرار إلي نغيرو على بلادنا، ومستعدين نفديوها بدمنا وباولادنا، ونفرحو كي نشوفو علمها يرفرف في كل بلاصة، ويقشعر لحمنا كي نسمعو النشيد الوطني تعزفو فرقة الجيش وندخلو في سينة أخرى ...
واحنا ناس من طينة ما تحبش الظلم، ونرفضو انا نعيشو مع الإرهابيين والمجرمين وقتالة الأرواح إلي رفضو بلادهم وناوين اليوم يرجعو باش يعملو بعمايلهم كيما عملو في سوريا وليبيا والعراق...
احنا التواسة نقولولهم انا مستعدين باش ندافعو على بلادنا وعلى ثورتنا وعلى هويتنا كرجل واحد مهما كانت اختلافاتنا ...
والبقاء للوطن قبل وبعد كل شيء.
